MALICE AND GRUDGE

کینہ ایسی نفسانی بیماری ہے جس سے دین اور ایمان خراب ہو جاتا ہے، عبادت میں رکاوٹ پیدا ہوتی ہے اور دل کی پاکی جاتی رہتی ہے۔ راہِ فقر میں تو یہ بیماری طالب کا سفر ہی الٹا کر دیتی ہے کیونکہ بغض و کینہ اس کو اللہ سے غافل کر دیتا ہے۔

عموماً کینہ اُن لوگوں میں زیادہ ہوتا ہے جو کسی کمزوری کی وجہ سے بدلہ لینے کی طاقت نہ رکھتے ہوں اس لیے دل ہی دل میں بغض کو فروغ دیتے رہتے ہیں۔

دوسروں کی خوشی پر غمگین اور ان کے غم پر خوش ہونا کینہ کی واضح علامت ہے۔

کینہ پرور کو جس سے کینہ ہوگا اسے سلام کرنا چھوڑ دے گا اور جب کینہ بڑھ جائے گا تو اس کے سلام کا جواب بھی نہیں دے گا یہاں تک کہ ا س کے ساتھ نماز میں بھی شریک نہ ہوگا، اسے حقارت کی نظر سے دیکھے گا، اس پر زبان دراز کرے گا اور غیبت، جھوٹ اور فحش کلامی سے اس کے بھیدوں کو ظاہر کرے گا۔

جو طالب دل میں بغض اور کینہ کو جگہ دیئے رکھے گا اس کا تزکیہ کیسے ہو گا اور وہ راہِ فقر کی منازل کیسے طے کرے گا؟

کینہ پرور ہمیشہ انتقام کے لیے موقع کی تلاش میں رہتا ہے۔ بعض اوقات تو اس کی شدت اس حد تک پہنچ جاتی ہے کہ دشمن کے مرنے کے بعد اس کی اولاد سے بدلہ لینے کا سلسلہ شروع ہو جاتا ہے۔