Religion and Scholars

قرآن کے معنی ولی کے قلب پر اترتے ہیں جبکہ عالم کے دماغ پر۔ دماغ کے بہت سے زاویے ہیں جبکہ قلب (روح) ایک ہی ہے جو اللہ سے ہے۔ اسی لیے اولیا قرآن کے ایک ہی معنی اخذ کرتے ہیں اور علما اپنے اپنے دماغ کے مطابق مختلف معنی اخذ کرتے ہیں۔

عجیب سا رواج چل نکلا ہے کہ جن کے پاس دولت اور اختیار نہیں وہ مذہب کے ذریعے طاقت حاصل کرتے ہیں۔

کسی عالم کا کام اس وقت متنازع ہو جاتا ہے جب وہ حکمرانی کی جنگ میں شامل ہو جائے۔

عالم راہِ باطن (فقر) کی طرف اس لیے نہیں آتے کیونکہ انہیں گفتگو سے لذت حاصل ہوتی ہے۔ گفتگو سے وہ لوگوں کو اپنا مطیع کرتے ہیں۔ جو جتنا بڑا گفتگو کا ماہر ہو گا اُسے اتنی ہی گفتگو میں لذت ملے گی اور وہ کبھی بھی باطن کی طرف نہیں آئے گا۔

اللہ تعالیٰ نے بنی اسرائیل کے علما میں سے کبھی کوئی نبی نہیں بھیجا بلکہ ہمیشہ کسی ایسے عام شخص کو نبوت عطا کی جو عالم نہیں تھا۔ اسی وجہ سے بنی اسرائیل کے علما نے ہمیشہ انبیا کی مخالفت کی کیونکہ وہ ان سے حسد کرتے تھے۔رسول اللہ صلی اللہ علیہ وآلہٖ وسلم نے فرمایا اَلْعُلَمَآءُ اُمّتِیْ کَاَنْبِیَآءِ بَنِیْ اِسْرَاءِیْلَ ترجمہ ”میری امت کے علما بنی اسرائیل کے انبیا کی طرح ہیں۔“ اور فرمایا اَلْعُلَمَآءُ وَرَثَۃُ الْاَنْبِیَآءِ ترجمہ ”علما انبیا کے وارث ہیں“(ترمذی 2682)۔ شیخ عبد القادر جیلانیؓ اپنی کتاب سرّالاسرار میں ان احادیث کی شرح کرتے ہوئے فرماتے ہیں کہ یہاں ان علما کی بات نہیں ہو رہی جنہوں نے صرف ظاہری علم حاصل کیا ہے بلکہ علمائے ربانی یعنی اولیائے کاملین (مرشد کامل) کی بات ہو رہی ہے جن کے پاس ظاہری علم کے ساتھ ساتھ علم ِباطن بھی ہے۔ سیّدنا غوث الاعظمؓ کی تعلیمات کے مطابق اگر علمائے ظاہر کو رسول اللہ صلی اللہ علیہ وآلہٖ وسلم کا وارث سمجھا بھی جائے تو ان کا رشتہ ذوی الارحام (وہ رشتہ دار جن کاحصہ قرآن و حدیث اور اجماع میں مقرر نہ ہو) جیسا ہے۔ وارث کامل وہ ہوتا ہے جو حقیقی اولاد ہو اور جو باپ سے تمام عصبی رشتہ داروں کی نسبت زیادہ قریب ہو اور وہ ظاہر و باطن میں اپنے باپ کا سرّہو۔ پس جو علما رسول اللہ صلی اللہ علیہ وآلہٖ وسلم کے حقیقی وارث ہیں وہ اولیا ہیں جن کے پاس ظاہر و باطن کا علم ہے۔

جتنے بھی فرقے ہیں ان سب کے عالموں کوعلم ِتزکیہ کے بارے میں تو پتہ ہے لیکن حالت ِ تزکیہ حاصل نہیں کیونکہ یہ حالت صرف کتابیں پڑھنے سے حاصل نہیں ہوتی۔ تزکیہئ نفس صرف کسی کامل مرشد کی نگاہ سے ممکن ہے۔

علما لوگوں کو تو نماز کی طرف بلاتے ہیں لیکن خود کبھی بھی عشق ِحقیقی کی نماز نہیں پڑھتے۔

بعض علما کثیر علم حاصل کرنے کے بعد تکبر میں مبتلا ہو جاتے ہیں خواہ وہ علم ِباطن ہی کیوں نہ ہو۔ یہ تکبر انہیں اللہ کے کرم سے محروم کر دیتا ہے۔