Divine Sustenance

رزق دو قسم کا ہے ، ایک توکل کے راستے سے ملتا ہے اور دوسرا مشقت کے راستے۔ مشقت کے ذریعے رزق کمانے کے بھی دو راستے ہیں، ایک حرام کا راستہ اور دوسرا حلال کا۔ اگر حلال کی طرف رجوع کرے گا تو حلال کے تمام ذرائع و اسباب اسے مہیا کر دئیے جائیں گے اور اگر حرام کی طرف رجوع کرے گا تو حرام کے تمام ذرائع اور اسباب اسے مہیا کر دئیے جائیں گے۔

رزق مقرر کیا جاچکا ہے لیکن انسان کو اس بات کا یقین ہی نہیں۔ غنی وہ ہے جو اللہ تعالیٰ کے مقرر کردہ رزق پر قناعت کرتا ہے۔

حیوانی جسم کا رزق اللہ تعالیٰ نے ازل سے ہی مقرر فرما دیا ہے اور عام حالات میں اس میں کمی بیشی نہیں ہوتی، چاہے اس کے لیے جتنی بھی کوشش اور جتن کر لیے جائیں۔جتنے بھی مکر و فریب اور حیلے کر لیے جائیں یہ رزق نہیں بڑھتا۔ البتہ اللہ تعالیٰ کی راہ میں بے ریا خرچ کرنے سے یہ روزی دس گنا سے ستر گنا تک بڑھا دی جاتی ہے۔

رزق کسی جگہ یا سبب کے ساتھ مخصوص نہیں بلکہ رزق ہر جگہ عام ہے، جو جہاں ہو اُسے وہیںکسی بھی ذریعے سے پہنچ جاتا ہے۔ جو لوگ ایک مقام سے ہجرت کرکے دوسری جگہ چلے جاتے ہیں اور صبر کرتے ہیں تو اللہ تعالیٰ ان کے توکّل کے باعث انہیں وہیں روزی پہنچانے کے اسباب پیدا فرمادیتا ہے۔

فرمایا گیا ہے کہ یہ رزق بندے کو اس طرح تلاش کر کے پہنچتا ہے جس طرح کہ موت۔ جب تک بندہ اپنے حصے کی روزی اس دنیا میں وصول نہیں کر لیتا اسے موت نہیں آتی۔

شیطان کو نہ رزق بڑھانے کی قوت حاصل ہے نہ کم کرنے کی۔وہ صرف اس کی فکر میں الجھا کرانسان کو اللہ سے دور کر سکتا ہے۔ جو اس کے دام میں الجھ کر رزق کی فکر میں اللہ کو بھلا دیتے ہیں، ان کا رزق نہ کم ہوتا ہے نہ زیادہ البتہ وہ اللہ سے دور ہو جاتے ہیں۔

ایک باپ اپنے بچوں کے لیے رزق کماتا ہے لیکن وہ ان کا رازق نہیں ہے، اسی طرح شوہر اپنی بیوی کے لیے رزق کا بندوبست کرتا ہے لیکن وہ اس کا رازق نہیں ہے۔ رازق صرف اور صرف اللہ کی ذات ہے اور اس نے سب کا رزق ازل میں ہی سب کو پیدا کرنے سے پہلے مقرر کر دیا تھا۔